खामगाव : महाविकास आघाडी सरकारने राज्यात नुकताच दहा रुपयात शिवभोजन हा उपक्रम सुरू केला. त्याची चांगलीच चर्चा सुरू आहे. दरम्यान, असाच उपक्रम गेल्या सात वर्षापासून बुलडाणा जिल्ह्यातील खामगाव शहरात सुरू आहे. काँग्रेसचे माजी आमदार दिलीपकुमार सानंदा यांच्या संकल्पनेतून इथे स्व. मातोश्री सुलोचनादेवी सानंदा शिदोरी गृहात फक्त एक रुपयात शेतकऱ्यांना पोटभर जेवण मिळते.
 

हे वाचा - ‘पीडीकेव्ही’ चे संशोधन केंद्र देशात अव्वल
गेल्या सात वर्षापासून घेत आहेत आस्वाद
माजी मुख्यमंत्री  तथा केंद्रीयमंत्री स्व. विलासराव देशमुख यांच्या प्रथम स्मृतीदिनी (ता.14 ऑगस्ट 2013) रोजी खामगाव मतदार संघाचे तत्कालीन आमदार राणा दिलीपकुमार सानंदा यांच्या संकल्पनेतून खामगाव कृषी उत्पन्न बाजार समितीच्या वतीने स्व. मातोश्री सुलोचनादेवी सानंदा शिदोरी गृह सुरू करण्यात आले. या शिदोरी गृहातमध्ये बळीराजाला नाममात्र एक रुपयात शुध्द सात्वीक जेवण देण्यात येत आहे. गेल्या सात वर्षांपासून शेतकरी बांधव एक रुपयात भोजनाचा लाभ घेत आहेत. साफसफाईसह शिदोरी गृहात चांगल्या प्रकारचे जेवण देत असल्याचे शेतकरी सांगतात आणि बाजार समितीच्या उपक्रमाबाबत समाधान व्यक्त करतात.

 
क्लिक करा - जालन्याची चोरीची कार नंबर प्लेट बदलून विकत होता; मात्र फसला डाव
गुरुवारी पातोडी व गोड पदार्थ
शिदोरी गृहात दररोज जेवणामध्ये पोळी, भाजी, भात, वरण या पदार्थांचा समावेश असतो. गुरुवारी बाजाराचा दिवस असल्याने जास्त शेतकरी येतात. त्यांच्यासाठी दर गुरुवारी पातोडी किंवा अन्य झणझणीत वऱ्हाडी भाजी आणि एक गोड पदार्थ देण्यात येतो.

विविध प्रकारचे उपक्रम राबविले जातात
खामगाव बाजार समितीमध्ये विविध प्रकारचे विधायक उपक्रम राबविण्यात येतात. शेतकऱ्यांना फक्त एक रुपयात शुद्ध आणि सात्वीक भोजनाची सोय स्व. मातोश्री सुलोचनादेवी सानंदा शिदोरी गृहात करण्यात आली आहे.
-दिलीपकुमार सानंदा, माजी आमदार, खामगाव